Пол Ластер (Paul Laster) се прошетал низ сите позначајни приватни музеи на светот и според неговите критериуми ги издвоил 10-те најдобри. Нагласува дека при евентуалната посета на Сеул, Париз, Венеција, Атина, Пекинг, Базел, Доха, Мајами или Бентонвил треба да ги погледнете вредните колекции што ги собрале и изложиле во лускузни изложбени простори богати љубители на уметноста.

Еве го неговиот прилог:

„Кога по некој месец (прилогов е објавен во летото- јули 2011, заб.м.) ќе биде и официјално отворен- Кристал Бриџиз музеј на американската уметност (Crystal Bridges Museum of Amerikan Art), прв музеј на листата, не смеете да го пропуштите. Се наоѓа во американскиот град Бентонвил во Арканзас. Алис Волтон (Alice Walton) е идеен творец и финансиер на ова вредно здание. Таа е наследничка на сопственикот на фирмата Wal-Mart, Сем Волтон (Sam Walton). Музејот ќе биде (е- заб.м.) отворен на 11. ноември 2011. година. Изграден е од дрво и стакло и се простира на дури 100.000 метри квадратни! Го проектирал архитектот Моше Сафди (Moshe Safdie). Целта е музејот да стане првокласна институција на националната (американската) уметност која содржи уметнички дела настанати од периодот на тн. колононијален стил до денес.

Најпознат претставник на колонијалниот стил, чии слики можете да ги најдете во овој музеј, е сликарот Џон Синглтон Копли (John Singleton Kopley). Кога е во прашање 19. век, можете да ги погледате делата на сликарите како Томас Моран (Thomas Moran), Џорџ Форест Браш (George de Forest Brush), Ашер Браун Дуранд (Asher Brown Durand) и Артур Фицвилијам Тејт (Artur Fitzwilliam Tait). Зачетниците на модерната уметност во Америка, чии слики исто така можете да ги видите во овој музеј, се Аршајл Горки (Arshile Gorky), Норман Роквел (Norman Rokwell), Хери Стренберг (Harry Strenberg) и Чарлс Шилер (Charles Sheeler). Ако ве интересира современата уметност, можете да ги погледате сликите на Енди Ворхол (Andy Warhol) и Волтон Форд (Walton Ford), како и скулптурите на Олденберг (Claes Oldenburg), Кери Џејмс Маршал (Kerry James Marshal) и Ник Кејв (Nick Cave).
Колекцијата на семејството Тубел (Rubell Family Collection) е музеј на Дон (Don) и Мера (Mera) Рубел кој се наоѓа во Мајами. Овој брачен пар започнал да собира колекција на современи уметнички дела уште во далечните 60-ти. Тие во 1993. година ги изложиле собраните дела во спомнатиот музеј. Тука се наоѓаат делата на некои прочуени уметници, како што се Жан Мишел Баскија (Jean Michel Basquiat), Синди Шерман (Cindy Sherman), Кејт Херинг (Keith Haring) и Такаши Мураками (Takaši Murakami).

Лееум, Самсунг музејот на уметноста (Leeum, Samsung Museum of Art) е музеј кој е сместен во Сеул. Го изградила во 2004. година фондацијата за култура на прочуената компјутерска компанија „Самсунг“. Тоа е голем комплекс што се состои од три архитектонски целини кои ги проектирале Рем Кулхас (Rem Koolhaas), Марио Бота (Mario Botta) и Жан Нувел (Jean Nouvel). Музејот го наследува кореанското национално богатство, односно уметнички дела на локални автори што настанале во минатото. Овде можете да најдете и интернационални дела на модерната уметност на 20. век. Исто така, во музејот се изложуваат и дела на се уште неафирмирани уметници кои со својата оригиналност заслужиле да и бидат прикажани на јавноста.

Фондацијата Карие за современа уметност (Fondation Cartier pour l`Art Contemporain)  е музејски простор сместен во Париз. Отворен е во 1994. година, а го дизајнирал францускиот архитект Жан Нувел. Поседува дела на интернационалната современа уметност, но и колекција на луксузни Картие часовници и накит кои датираат уште од 1984. година. Колекцијата на овој музеј поседува повеќе од 1.000 уметнички дела. Можете да погледате слики, скулптури и инсталации на 300 автори, вклучувајќи дела на Вин Делвоје (Win Delvoye), Вилјем Кентриџ (William Kentridge), Метју Барни (Mathew Barney), Рон Муек (Rohn Mueck). Посебно внимание предизвика Муековата инсталација под назив „В кревет“ (In Bed).

Фансоа Пино фондацијата (Francois Pinault Foundation) е музеј што се наоѓа во Венеција. Главен човек на аукциската куќа Кристи (Christie) е францускиот магнат Франсоа Пино, кој во овој галериски простор ја сместил својата прилично голема колекција на дела на современата уметност. Музејот опфаќа две згради. Едната е палата под назив „Палацо Граси“ (Palazzo Grassi) и е отворена за посетителите во 2005. година. Другата е велелепната палата „Пунда дела Догана“ (Punta della Dogana) што ја преуредил и проектирал Тадао Андо и е отворена за јавноста во 2009. година. На спомнатите места можете да погледате дела од автори како што се Маурицио Кателан (Maurizio Cattelan), Пјотр Уклански, Такаши Мураками, Синди Шерман, Сигмар Полке (Sigmar Polke) и др.
Destes Fondation for Contemporary Art е уметничка институција која од 1983. се наоѓала во Женева, но во 1998. година е преместена во северното предградие на Атина. DESTES фондацијата за современа уметност е музејски простор кој содржи уметнички дела што ги собрал Дакис Јоану (Dakis Joannou). Колекцијата содржи уметнички дела на автори како што се Тим Нобле, Сју Вебстер (Sue Webster), Тауба Ауербах (Tauba Auerbach), Џим Дрејн (Jim Drain) и др. Дакисовата јахта е исто така своевидно уметничко дело што го насликал Џеф Кунс (Jeff Koons). Во овој музејски простор можете да видите многу мултимедијални проекти. Постои и DESTE награда што им се доделува секоја година на грчки уметници кои придонесуваат за развој на современата уметност на својата земја. Исто така постои и DESTE модна линија на облека што ја дизајнираат најдобрите грчки дизајнери.

Уленс центарот за современа уметност (Ullens Center for Contemporary Art) е уметничка институција што ја основале белгиските колекционери на уметнички дела Гај и Миријам Уленс (Ullens) во 2007. година. Овој музеј бил еден од првите непрофитабилни уметнички центри во Кина. Се наоѓа во некогашна фабрика за муниција, во уметничкиот кварт на Пекинг. Овде се изложуваат дела на современата кинеска уметност и дела на најдобрите уметници кои живеат и работат во Кина. Најпознати кинески уметници чии дела можете да ги видите се Хуан Јонг Пинг, Занг Хуан и Јан Пеи Минг.

Овој музеј е отворен за јавноста со изложба под назив „85 Нов бран: раѓање на кинеската современа уметност“ (85 New Wave: The Birth of Chinese Contemporary Art) и прикажувал уметнички дела на кинески автори кои настанале од 1985. до 1990. година. Овој период ја обележал промената на правецот во кинеската уметност и нејзиното поврзување со светската уметничка сцена. UCCA центарот е еден од најголемите изложбени простори во Кина и прва културна институција што ја основале странци. Тој нуди различни содржини како уметнички, модни, музички, дизајнерски и мултимедијални манифестации. Ги поттикнува младите автори да се едуцираат и да ги изложуваат своите дела.

Белгискиот брачен пар Уленс во 2002. продал вредна колекција на акварели на прочуениот англиски сликар Тарнер (J. M. W. Turner) за да вложи во купување на кинески дела и во изградба на музеј што се простира на 800 метри квадратни. Музејот го проектирале Жан Мишел Вилмотл (Jean – Michel Wilmotle) и Ма Кингун (Ma Qingyun). Содржи две галериски сали, едната има подвижни ѕидови за да може да прими и инсталации со големи димензии. Изложбата под назив „Ораклова куќа“ (House of Oracle) е отворена во 2008. година како ретроспектива на дела на контроверзниот кинески уметник Хуан Јонг Пинг (Huan Yong Ping), кој инспирација пронашол во дадаизмот и традицијата на кинеската нумерологија. Неговите инсталации содржат и необични материјали, како што се змии и шкорпии.

Бејелер фондацијата (Foundation Beyeler) е музеј што го основал брачниот пар Бејелер во Базел. Тој настанал од прилично големата колекција на уметнички дела од 20. век, што ја собрале швајцарскиот трговец со уметнички дела Ернст Бејелер и неговата жена Хилди (Hildy). Фондацијата е основата во 1982. година, а отворена за јавноста во 1997. во музејско здание во близина на Базел. Зградата ја проектирал архитектот Ренцо Пијано (Renzo Piano). Овој музеј содржи многу капитални дела на светски сликари. Посетителите се одушевени од фактот дека тука можат да се погледаат дела на големи уметници, како што се Пол Сезан (Paul Cezanne), Ван Гог (Vincent van Gogh), Пабло Пикасо (Picasso), Мондријан (Piet Mondrian), Шагал (Marc Chagall), Жорж Брак (Georges Baque), Едгар Дега (Degas), Василиј Кандински, Алберто Ѓакомети (Giacometti), Паул Кле (Klee), Анри Матис (Henri Matisse), Клод Моне (Claude Monet), Џексон Полок (Jackson Pollock), Жорж Сера (Georges Seurat), Анри Русо (Henri Rousseau), Огист Роден (Auguste Rodin), Рој Лихтенштајн (Roy Lichtenstein), Енди Ворхол и многу други!

Матхаф: арапски музеј на модерната уметност (Mathaf: Arab Museum of Modern Art) се наоѓа во главниот град на Катар, Доха. „Матхаф“ се изговара “мат-хаф“ и на арапски значи „музеј“. Го основал шеикот Хасан ал Тани (Sheikh Hassan bin Mohamed bin Ali Al Thani), кој пред 20 години почнал да откупува дела на арапската модерна уметност. Нареден е во првите 10-мина колекционери на дела на модерната уметност на светот. Музејот е отворен во 2010. година. Зградата ја проектирал францускиот архитект Жан Франсоа (Jean Fracois). Содржи уметнички дела по потекло од сите арапски земји, кои датираат дури од 1840. година до денес. Во овој музеј можете да видите над 1.000 скулптури и слики.

Заблудовиц колекцијата (Zabludowitcz Collection) се наоѓа во Лондон. Оваа уметничка институција ја основал во 1994. милионерскиот брачен пар Заблудовиц. Содржи повеќе од 2.000 дела на современата уметност, со фокус на оние дела кои претставуваат уметнички тенденции кои се штотуку во повој. Во овој музеј можете да погледате уметнички остварувања кои датираат од 1970. до денес. Застапени се многумина значајни модерни уметници, како што се Габриел Акеведо Веларде (Gabriel Acevedo Velarde), Кристијан Андерсон (Christian Anderson), Марсела Асторга (Marcela Astorga) и многу други.

Де Понт музејот на современата уметност (De Pont Museum of Contemporary Art) се наоѓа во холандскиот град Тилбург. Го добил името според адвокатот и бизнисмен де Понт (J. H. de Pont) кој инвестирал во развој на визуелните уметности уште од 1988. година. Архитектот Бентем Кроувел (Benthem Crouwel) го проектирал овој музеј, правејќи топло осветлен простор кој е отворен за јавноста во 1992. година. Музејот поседува дела на светски признати уметници, меѓу другите тоа се Марлен Дима (Marlene Dumas), Герхард Рихтер (Gerhard Richter), Ричард Сера (Richard Serra), Ричад Лонг (Richard Long)“.

(Преземено од: http://www.b92.net, автор Paul Laster, Flavorpil)l